ប្រដាល់​គុន​ខ្មែរ​​ត្រៀម​​បង្ហាញ​​ខ្លួន​លើក​​ដំបូង ក្នុង​ព្រឹត្តិ​ការណ៍​​កីឡា ស៊ី​ហ្គេម ឆ្នាំ​២០១៧​នេះ?

(ភ្នំពេញ)៖ សហព័ន្ធកីឡាប្រដាល់គុនខ្មែរ បានប្រកាសជំហរត្រៀមខ្លួនរួចជាស្រេច នៅក្នុងការចម្រាញ់យកកីឡាករឆ្នើមៗ មកបំពាក់បំប៉នការហ្វឹកហាត់ ដើម្បីត្រៀមចូលរួមប្រកួតកីឡាស៊ីហ្គេម លើកទី២៩ នៅទីក្រុងកូឡាឡាំពួរ ប្រទេសម៉ាឡេស៊ី នាខែសីហា ឆ្នាំ២០១៧នេះ ប្រសិនបើក្រុមប្រឹក្សាកីឡាអាស៊ីអាគ្នេយ៍ អនុញ្ញាតឲ្យចូលរួមតាមសំណើរបស់គណៈកម្មាធិការជាតិអូឡាំពិកកម្ពុជា ដែលកំពុងតស៊ូមតិជាមួយស្ថាប័នកីឡាប្រចាំតំបន់អាស៊ានមួយនេះ។

លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែងក្នុងមហាសន្និបាតនាពេលថ្មីៗនេះថា ថ្វីត្បិតកីឡាប្រដាល់បែងចែកជា ២សហព័ន្ធពិតមែន ប៉ុន្ដែគុនខ្មែរ គឺជាការងារចាស់ ដែលសមាជិកប្រតិបត្តិ ត្រូវបន្ដការអនុវត្តឆ្ពោះទៅរកភាពរីកចម្រើន។ ប៉ុន្ដែចំពោះគោលដៅសំខាន់បំផុតនោះ គឺការត្រៀមខ្លួនចូលរួមប្រកួតកីឡាស៊ីហ្គេមលើកដំបូង ក្នុងឆ្នាំ២០១៧នេះ ដោយបច្ចុប្បន្នសហព័ន្ធកំពុងបណ្ដុះបណ្ដាលកីឡាករ ៦វិញ្ញាសាសម្រាប់ចូលរួមប្រកួតក្នុងព្រឹត្តិការណ៍អន្ដរជាតិនេះ។

ចំណែកលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់ថា ការដាក់បញ្ចូលកីឡាប្រដាល់គុនខ្មែរ ទៅក្នុងប្រកួតកីឡាស៊ីហ្គេម ឆ្នាំ២០១៧ ពេលនេះគណៈកម្មាធិការជាតិអូឡាំពិកកម្ពុជាកំពុងពិភាក្សាការងារនេះ ជាមួយក្រុមប្រឹក្សាកីឡាអាស៊ីអាគ្នេយ៍។ ប៉ុន្ដែវាអាចនឹងទទួលបានលទ្ធផលល្អ ព្រោះការស្នើដាក់បញ្ចូលកីឡាគុនខ្មែរលើកដំបូងនេះ គឺស្ថិតក្នុងវិញ្ញាសាកីឡា «មួយ» ដែលគេបានអនុម័តជាប្រភេទកីឡាស៊ីហ្គេមស្រាប់។

គួរបញ្ជាក់ថា គុនខ្មែរ គឺជាឈ្មោះថ្មី ដែលគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា សម្រេចប្រើប្រាស់ជាផ្លូវការ សម្រាប់តែសហព័ន្ធកីឡាប្រដាល់គុនខ្មែរ លែងពាក់ព័ន្ធជាមួយកីឡាប្រដាល់សកលទៀតហើយ។ ប៉ុន្ដែកន្លងមកគុនខ្មែរ ពុំធ្លាប់មានវត្តមានក្នុងការប្រកួតកីឡាស៊ីហ្គេមនោះទេ ហើយការតស៊ូមតិ ដើម្បីដាក់បញ្ចូលប្រភេទកីឡាក្បាច់គុនបុរាណខ្មែរនេះ ក៏ដើម្បីជាការត្រៀមខ្លួនឆ្ពោះទៅស៊ីហ្គេម ឆ្នាំ២០២៣ នៅពេលកម្ពុជាធ្វើជាម្ចាស់ផ្ទះផងដែរ៕